Австралија го регистрираше првиот смртен случај од дифтерија по речиси десет години, додека земјата се соочува со најголемата епидемија на оваа болест што може да се спречи со вакцинација во последните неколку децении.
Во март, Северна Територија прогласи епидемија на дифтерија, а случаи се регистрирани и во Западна Австралија, Јужна Австралија и Квинсленд.
Бројот на заразени почнал да расте кон крајот на 2025 година, а нагло се зголемил во февруари, објави Би-Би-Си.
Годинава се регистрирани 245 случаи, што претставува најголема епидемија на дифтерија во Австралија од 1991 година, при што најголем дел од случаите се во оддалечени домородни заедници.
Министерот за здравство на Северна Територија, Стив Еџингтон, изјави дека резултатите од обдукцијата од странска лабораторија покажале дека дифтеријата била причина за смртта на маж кој починал во април во болницата „Ројал Дарвин“.
Тоа е прв смртен случај од оваа болест во Австралија од 2018 година.
Во последните недели властите ги засилија напорите за вакцинација во најпогодените области, а здравствените власти соопштија дека бројот на нови случаи почнал да опаѓа.
„Нашата влада оваа ситуација ја сфати многу сериозно и напорно работиме за да ги разбереме причините и да ја ставиме под контрола“, изјави Еџингтон.
Според податоците, од 30 март досега биле дадени повеќе од 10.400 вакцини.
Меѓу јануари минатата година и мај оваа година, Северна Територија регистрирала 163 случаи на дифтерија, од кои 48 биле респираторни, а 115 кожни инфекции.
Во март здравствените власти во Западна Австралија потврдија два случаи на респираторна дифтерија, што е првпат по повеќе од 50 години таму да бидат регистрирани вакви случаи.
Властите ги повикаа жителите, особено тинејџерите и возрасните на кои им се потребни бустер дози, да се вакцинираат.
Главниот медицински службеник на Австралија, Мајкл Кид, минатата недела ја прогласи дифтеријата за заразна болест од национално значење.
Австралиската влада најави и пакет помош од 7,2 милиони австралиски долари за зајакнување на вакцинацијата и ресурсите во погодените подрачја.
