Лидерот на Демократската унија за интеграција (ДУИ), Али Ахмети, најави дека во иднина ќе се повлече од претседателската функција во партијата и ќе се приклучи на ветераните.
Говорејќи на изборното собрание на огранокот на ДУИ во Куманово, Ахмети порача дека нема намера засекогаш да остане на чело на партијата.
„Нема да останам засекогаш претседател на партијата. Сакам да се приклучам на ветераните и да видам како ќе се борам како ветеран“, изјавил Ахмети.
Тој најавил дека и по повлекувањето од лидерската позиција ќе остане активен во политичките процеси и ќе продолжи да придонесува за, како што рекол, албанската кауза.
Во своето обраќање ги спомнал и поранешните партиски функционери, меѓу кои и Садула Дураку, за кого посочил дека ќе биде дел од раководството на комитетот на ветераните.
Најавата на Ахмети веќе отвори прашања за идното раководство на ДУИ и за процесот на наследување во партијата. Политички аналитичари оценуваат дека најголем предизвик за ДУИ ќе биде зачувувањето на внатрешното единство по заминувањето на лидерот кој повеќе од две децении е нејзино најпрепознатливо лице.
Според достапните информации, во локалните структури на партијата веќе се направени значителни кадровски промени, при што се сменети 73 проценти од раководните позиции.
