Бајден откри детали од односите со Зеленски: Беше тврдоглав и недоволно благодарен

Поранешниот американски претседател Џо Бајден во своите нови мемоари открива детали од односите со украинскиот претседател Володимир Зеленски, но и приватни разговори со други светски лидери за време на неговиот мандат во Белата куќа.

— реклама —

Бајден пишува дека првично се сомневал дали Зеленски има доволно искуство и издржливост за да се справи со воената криза во Украина. Иако подоцна го пофалил како воен лидер, признава дека нивните односи повремено биле заладени. Според него, Зеленски знаел да биде „темпераментен и тврдоглав“, а не бил толку благодарен колку што очекувал кога барал дополнително оружје и помош од Вашингтон.

— реклама —

Во мемоарите, Бајден се осврнува и на предупредувањата на американското разузнавање во 2021 година за руските воени движења околу Украина, неколку месеци пред инвазијата во февруари 2022 година. Тој наведува дека тешко ги убедувал европските сојузници и украинските власти дека рускиот претседател Владимир Путин се подготвува за напад врз целата земја. Подоцна споделил разузнавачки информации за плановите за државен удар во Киев, вклучително и подготовката на пропагандно видео што го опишува како речиси „холивудска продукција“.

Бајден открива и дека поранешната германска канцеларка Ангела Меркел зад затворени врати му зборувала за проблематичниот однос со Доналд Трамп. На почетокот на 2021 година, таа му рекла дека не може да ја разбере фасцинацијата на Трамп со Путин.

— реклама —

Дел од мемоарите е посветен и на повлекувањето на американската војска од Авганистан во август 2021 година. Бајден пишува дека воените и разузнавачките претставници го уверувале оти авганистанската влада ќе опстане најмалку шест месеци по заминувањето на американските војници, но проценките се покажале како погрешни за само неколку дена.

— реклама —

Тој се присетува и на средбите со семејствата во воздухопловната база Довер по нападот во кој загинаа 13 американски војници. Бајден признава дека некои од роднините го сметале за одговорен и дека дел од нив никогаш нема да му простат.