Белата куќа денеска соопшти дека се водат „сериозни“ разговори за можна нова „пауза“ во конфликтот во Појасот Газа, што би овозможило ослободување на заложниците.
Брет Мекгурк, советникот на американскиот претседател Џозеф Бајден за Блискиот Исток, е во регионот за да учествува во разговорите, изјави портпаролот на Советот за национална безбедност Џон Кирби.
Кирби рече дека пратеникот е денеска во Каиро и ќе разговара за „можноста за нов договор за ослободување на заложниците, што ќе бара хуманитарна пауза“ за време на неговата посета на регионот.
„Ни претстои пауза подолга од една недела, како што беше и минатиот пат. Тоа би било можност да се ослободат заложниците и да се достави хуманитарна помош во Појасот Газа“, додаде Кирби, кој не сакаше да даде други детали за можната пауза.
Како што пренесува американскиот сајт Аксиос, Израел на палестинското движење Хамас му понудил, со посредство на Катар и Египет, двомесечна пауза во борбите и воздушните напади во Газа во замена за ослободување на сите заложници.
Околу 250 луѓе беа киднапирани и однесени во Појасот Газа откако Хамас ја нападна израелската територија на 7 октомври.
Околу 100 заложници беа ослободени на крајот на ноември како дел од размената за палестински затвореници, по преговорите водени со посредство на Катар, во кои активно учествуваа и САД.
Израелските власти тврдат дека во Газа се уште има 132 киднапирани лица, а се стравува дека 28 загинале.
