Германските безбедносни служби тврдат дека Русија ги интензивирала кампањите за ширење дезинформации во пресрет на покраинските избори во септември, на кои се очекува добар резултат на крајнодесничарската Алтернатива за Германија (АфД).
Според извори на Ројтерс, целта на кампањите е да се продлабочи политичката поларизација и да се наруши угледот на владејачката Христијанско-демократска унија (ЦДУ), нејзиниот коалициски партнер Социјалдемократската партија, како и на Зелените и Слободната демократска партија.
Изворите наведуваат дека преку социјалните мрежи се шират видеа со логоа на познати медиуми, меѓу кои Би-Би-Си и германскиот јавен сервис АРД, во кои се пласираат лажни обвинувања против локални политичари.
Покраинските избори во септември ќе се одржат во Берлин, Саксонија-Анхалт и Мекленбург-Западна Померанија, а според анкетите, АфД би можела да освои најмногу гласови.
Германската влада и претходно предупреди на слични руски дезинформациски кампањи пред минатогодишните парламентарни избори, додека Москва ги отфрла обвинувањата дека стои зад такви активности.
