Репрезентациите на Еквадор и Курасао ги поделија бодовите во натпреварот од второто коло во групната фаза на Светското првенство, откако одиграа без голови (0:0) на стадионот во Канзас.
Еквадорците уште од самиот почеток ја презедоа иницијативата и создадоа неколку опасни ситуации пред противничкиот гол, но не успеаја да најдат начин да го совладаат расположениот голман на Курасао, Елој Ром.
Притисокот на Еквадор продолжи и во второто полувреме, кога селекцијата целосно доминираше на теренот и создаде уште повеќе можности за погодок. Сепак, Курасао успеа да ја сочува својата мрежа благодарение на извонредната партија на Ром.
Голманот на Курасао беше апсолутен херој на натпреварот, откако забележа дури 15 одбрани и заслужено ја доби максималната оценка 10 според статистичката платформа „Софаскор“.
Со ваквиот учинок, Ром се приближи до рекордот по бројот на одбрани на едно Светско првенство. Рекордот и натаму го држи американскиот голман Тим Хауард, кој на Мундијалот во 2014 година имаше 16 одбрани против Белгија, но во натпревар што траеше 120 минути поради продолженијата.
Освоениот бод е прв во историјата за Курасао на светските првенства и ги одржува надежите на селекцијата за пласман во нокаут-фазата.
По две одиграни кола, и Еквадор и Курасао имаат по еден бод. Германија веќе обезбеди пласман во осминафиналето со максимални шест бодови, додека Брегот на Слоновата Коска има три.
Во последното коло Еквадор ќе се соочи со Германија, додека Курасао ќе игра против Брегот на Слоновата Коска, во обид да избори место во нокаут-фазата.
