„Безбеден град“ фатил Србин со 166 км/ч, по три месеци подоцна го уапсија на Табановце

Српски државјанин бил уапсен на граничниот премин Табановце, откако полициската проверка покажала дека преку системот „Безбеден град“ бил евидентиран како возач кој на автопатот Гевгелија – Демир Капија управувал автомобил со брзина од 166 километри на час, на делница каде што дозволената брзина е 80 километри на час.

— реклама —

Според Министерството за внатрешни работи, станува збор за 39-годишниот М.П. од Србија, кој бил лишен од слобода вчера, на 23 октомври, околу 16 часот, при обид да ја напушти Македонија.

— реклама —

При проверката на автомобилот „баик“, со српски регистарски ознаки, полицијата утврдила дека возачот бил евидентиран како сторител на кривично дело „безобѕирно управување со моторно возило“, предвидено во член 297-а од Кривичниот законик.

Прекршувањето било регистрирано на 15 јули годинава, кога осомничениот се движел со 86 километри на час над дозволената брзина, односно повеќе од двојно побрзо од ограничувањето на таа делница.

— реклама —

По приведувањето, српскиот државјанин бил спроведен и задржан во Полициската станица Неготино, а за случајот бил известен јавен обвинител.

Од МВР информираат дека по целосното документирање на настанот против него ќе биде поднесена соодветна кривична пријава.