Јужноафриканската полиција ги истражува околностите во кои трагично го загуби животот Маја Јанеска, познатата инфлуенсерка и мејк-ап артистка која потекнува од Македонија. Таа во петокот била пронајдена со прострелна рана во главата, јавува еден јужноафрикански портал.
Според порталот, полицијата не ја третира смртта на Јанеска како сомнителна, но семејството и пријателите изјавиле дека не можат да веруваат дека таа сама би си го одзела животот.
„Полицијата добила повик за лице кое наводно се самоубило во имотот Басонија. По пристигнувањето на дадената адреса, полицијата пронашла жена во спалната соба со прострелна рана во главата. До неа имало огнено оружје. Смртта ја потврдил лекар“, изјавил портпаролот на полицијата Масондо.
Порталот пренесува дека нејзиното момче за време на настанот било во домот.
Познатата инфлуенсерка пред неколку дена била во Македонија.
„Не можам да поверувам дека повеќе не е меѓу нас, а само минатата недела беше во Македонија да го прослави тоа што на државава и помогна да биде признаена од Јужна Африка и после долго време да се воспостават дипломатски односи“, пишува на Фејсбук нејзиниот долгогодишен пријател Сефер Цаноски од универзитетот ФОН.
Цаноски вели дека Маја му кажала дека создала голема мрежа на пријатели во многу држави на африканскиот регион и дека ја почитуваат како успешна жена.
