Битола вечерва повторно ќе биде во центарот на филмските случувања, со отворањето на 47. Интернационален фестивал на филмска камера „Браќа Манаки“.
Фестивалот ќе биде отворен со македонскиот филм „Скејтањето не е за девојчиња“ на режисерката Дина Дума, а годинашното издание носи рекорден број филмски автори, гости и едукативни содржини.
Под Пелистер пристигнуваат голем број значајни имиња од светската кинематографија. Меѓу гостите се добитниците на наградите за животно дело Ден Лаустсен и Џеф Кроненвет, како и оскаровците Јануш Камински и Воли Фистер. На фестивалот ќе присуствуваат и турскиот режисер Семи Капланоглу и финскиот кинематографер Тимо Салминен.
Директорот на фестивалот, Димитрија Доксевски, истакнува дека интересот за ова издание е исклучително голем, како во однос на авторите, така и во однос на програмата.
Филмовите од главната селекција ќе се прикажуваат во Центарот за култура во Битола, каде што е поставена нова проекциска опрема и ново платно, со цел подобар квалитет на филмската слика.
Новитет годинава е и отвореното кино во дворот на Музејот на Битола. Проекциите од домашната програма „Макпоинт“ ќе бидат достапни бесплатно за посетителите.
Фестивалот носи и ново меѓународно партнерство. Друштвото на филмските работници на Македонија воспоставува директна соработка со Европската филмска академија преку секторот за кинематографери.
Според претседателката на ДФРМ, Марија Димитрова, соработката ќе започне со панел-дискусија на 21 септември, посветена на условите за работа и техничките предизвици со кои се соочуваат филмските сниматели. На панелот ќе учествуваат Јануш Камински и Тимо Салминен.
