Новиот директор на Царинска управа, Стефан Богоев, ќе биде дочекан на новата функција со протест на вработените, кои бараат додаток од 30 отсто на платите, кој им бил ветен со колективниот договор.
Сојузот на синдикатите ова денеска го соопшти оред јавноста и најави понатамошна можна радикализација со затворање на граничните премини. Поранешниот градоначалник на Општина Карпош и актуелен потпретседател на СДСМ ќе дојде на чело на Царина на местото на Славица Кутиров.
„Како што најавивме дека ќе имаме жешко синдикално лето, в петок од 12 часот имаме протест во Царинската управа. Вработените во Царинската управа, иако со години имаат право на додаток од 30 отсто, тие не го добиваат. Тие обезбедија 30 отсто покачување на платата во Министерство во финансии, во други институции не добиваат. Ќе направиме предупредувачки протест за вработените во Царинската управа, кои го полнат буџетот со повеќе од 50 отсто. Знаеме дека има нов директор, чекаме прием, да видиме дали ќе нѐ сослуша. Не се откажуваме од барањето. Не нѐ интересира дали има нов или стар директор“, објави Сојузот на синдикатите.
