Американските регулатори привремено го приземјија авионот „737 MAX 9“ на Боинг за безбедносни проверки, откако вратата под притисок се откина на половина од летот и го принуди авионот на „Алјаска ерлајнс“ да се врати во пристаништето во Портланд. Инспекторите објавија дека проблемите со притисокот во авионите биле забележани неколку дена пред инцидентот во петокот. Портпаролката на ФАА на прес-конференција рече дека пилотите пријавиле предупредувачки светла за притисок на три претходни летови на „Боинг Макс 9“ на „Алјаска ерлајнс“, вклучен во инцидентот.
Пред речиси пет години, регулаторите ширум светот ги повлекоа од употреба сите авиони „737 MAX на Боинг“ поради две несреќи во кои загинаа 346 луѓе. Во моментов, светските превозници оперираат со околу 215 авиони „Боинг 737 МАКС 9“, според податоците од авијациската аналитичка компанија Цириум, а околу 170 од нив имаат врати што паднале при летот во саботата за „Алјаска ерлајнс“.
Другите модели имаат различен тип на врата за итни евакуации.
„Јунајтед ерлајнс“ и „Аљаска ерлајнс“ објавија дека пронашле лабави делови во неколку приземјени авиони MAX 9, што предизвикува нова загриженост за квалитетот на производството на најпродаваните авиони.
„Алјаска ерлајнс“ доцна синоќа соопшти дека првичните извештаи од нејзините техничари укажувале дека некои „лабави делови“ биле видливи на некои авиони за време на инспекција на флотата. Компанијата чека документација од Боинг и Федералната управа за воздухопловство на САД (FAA) пред да започнат официјалните инспекции.
„Јунајтед“, вториот американски превозник кој леташе со моделот Боинг со панели, рече дека прелиминарните проверки откриле завртки кои треба да се затегнат на неколку панели. Извор запознаен со предметот рече дека „Јунајтед“ досега пронашол десетина авиони со лабави завртки за време на прелиминарните проверки, што е повеќе од првичните пет пријавени од индустриското издание The Air Current, а бројот може да се зголеми.
Сè уште се во тек дискусиите меѓу Боинг, ФАА и авиокомпаниите за прецизни упатства за инспекција.
Британската управа за цивилно воздухопловство во саботата извести дека нема авиони регистрирани во Британија што се предмет на директивата на FAA. Тие додаваат дека сите оператори на авиони „737 MAX 9“ кои ќе влезат во британскиот воздушен простор ќе бидат обврзани да ја почитуваат регулативата на американскиот регулатор. Кинескиот регулатор побара детали за инцидентот, изјави пред два дена извор запознаен со ова прашање. „Блумберг“ претходно објави дека Кина се уште не одлучила дали ќе преземе акција.
Европската агенција за воздухопловна безбедност (ЕАСА) во неделата ја усвои регулативата на американскиот регулатор за привремено приземјување на авионите на „Боинг 737 MAX 9“. Сепак, тие истакнаа дека ниту еден превозник-членка на ЕУ нема авион во „приземјена“ конфигурација во својата флота.
Бразилскиот регулатор ANAC во неделата објави дека одлуката на американската FAA автоматски се применува на сите летови во Бразил. Тие истакнаа дека само Копа ерлајнс користи авиони од овој тип на меѓународни летови на рутата до аеродромот Гуарулос во Сао Паоло.
Транспорт Канада во неделата објави дека канадските превозници не го користат авионот Боинг 737 MAX 9. Регулаторот на Обединетите Арапски Емирати во неделата нагласи дека ниту еден од нивните национални превозници не ги користи авионите погодени од наредбата на американскиот регулатор.
Индиската управа за цивилно воздухопловство (DGCA) во понеделникот објави дека авионот 737 MAX 8 на Боинг „поминал“ на проверка. Тие додадоа дека ниту еден индиски превозник не користи 737 MAX 9.
