„Борба против криминал е апсење на вработен кој се обидел да земе мито, тоа тешко го сфаќа СДС затоа што кај нив се крадеше од чистачка до премиер“, вели ВМРО-ДПМНЕ

ВМРО-ДПМНЕ преку соопштение реагира на обвинувањата од СДСМ во врска со приведувањето на вработен во Владата, кој, според информациите на партијата, бил фатен во обид да земе мито.

— реклама —

Од ВМРО-ДПМНЕ велат дека случајот е доказ оти институциите постапуваат против секој за кого постојат сомневања за незаконско постапување, без оглед на неговата работна позиција.

„Уапсениот вработен се обидел да земе мито, и веднаш бил обработен од МВР, дадени се бележани пари и сега е зад решетки и се води постапка за него“, наведуваат од партијата.

— реклама —

Од ВМРО-ДПМНЕ ја критикуваат СДСМ поради реакциите на случајот, обвинувајќи ја опозициската партија дека се обидува да создаде впечаток дека институциите не функционираат.

— реклама —

„Борба против криминал е апсење на вработен кој се обидел да земе мито“, велат од ВМРО-ДПМНЕ, додавајќи дека ваквите постапки, според нив, покажуваат дека „има правна држава и дека владее законот за сите“.

Партијата упатува и низа критики кон СДСМ и Венко Филипче, обвинувајќи ги дека со своите реакции го „бранат криминалот“. Од ВМРО-ДПМНЕ дополнително тврдат дека за време на претходната власт немало санкционирање на вакви случаи, но овие обвинувања не ги поткрепуваат со конкретни докази во реакцијата.

„Оваа Влада покажа дека се бори против криминалот секаде и против сите кои направиле незаконитост“, наведуваат од ВМРО-ДПМНЕ.