Пожарите кои изминативе денови зафатија повеќе подрачја во Македонија предизвикаа сериозни проблеми, а во дел од критичните ситуации во гаснењето се вклучија и доброволни противпожарни екипи.
Во тетовското село Туденце, доброволци од Скопје, Гостивар и Тетово помогнале во борбата со огнената стихија, со што, според Дирекцијата за заштита и спасување, било спречено пожарот да се прошири до манастирскиот комплекс.
Критична била состојбата и во мариовското село Чаниште, каде што огнот зафатил повеќе од 20 куќи и плевни. Четворица жители побарале медицинска помош поради вдишување чад, а постои и сомнеж дека пожарот бил подметнат.
Зголемениот број пожари го вклучи алармот кај надлежните институции. Од Центарот за управување со кризи информираат дека е издадено портокалово предупредување поради високиот ризик од пожари на отворен простор.
„Поради ваквите временски услови постои висок ризик од појава и ширење на пожари на отворен простор и шумски пожари со висок интензитет на целата територија на Македонија. Апелираме на особена внимателност“, велат од ЦУК.
Надлежните апелираат да не се пали оган на отворено и во близина на сува трева или шума. На граѓаните им се препорачува, доколку немаат неопходна причина, да избегнуваат движење во високоризичните подрачја, а секој забележан пожар веднаш да го пријават на 112.
Покрај пожарите, Македонија е зафатена и од топлотен бран со исклучително високи температури. Според Управата за хидрометеоролошки работи, топлото време ќе продолжи и во наредните денови.
Пожарите кои ја зафатија земјата во текот на неделата се гаснат и од земја и од воздух, а на терен е ангажирана расположливата механизација.
