Мојата земја никогаш не била заложник на притисоците кога станува збор за протерувањето руски дипломати, рече бугарскиот премиер Бојко Борисов по повод информациите дека бугарските власти протерале руски дипломат под сомнение за шпионажа.
„Претседателот Путин ме познава многу добро, тој знае и дека јас не сум подложен на притисоци. Кога на сите им наредуваа да протеруваат дипломати, јас не го сторив тоа. Сепак, ние сега фативме еден дипломат вклучен во шпионажа и одлучив веднаш да го решам прашањето“, рече тој.
Инаку, Бугарските власти одбиле да му издадат виза на рускиот воен аташе во Амбасадата на Русија во Софија еден ден по протерувањето друг руски дипломат, пренесува бугарската агенција „Фокус“ повикувајќи се на Министерството за надворешни работи на Бугарија. Дипломатот на кој му е одбиена визата сè уште е во Москва.
Одлуката за неиздавање виза била донесена по препорака од неименувана институција со која е договорено именувањето, а која дала негативно мислење. Од министерството не објавија детали за причините за одлуката, но нагласија дека тоа не значи оти рускиот дипомат ќе биде прогласен за персона нон грата.
Москва била информирана за таа одлука, информира бугарското МНР, но Русија сè уште не се произнесла јавно за проблемот.
фото: Архива
