„Бош“ ќе укине уште 750 работни места во Германија до 2029 година

Германскиот автомобилски добавувач „Бош“ планира до крајот на 2029 година да укине уште 750 работни места во својот погон во Абштат, во сојузната покраина Баден-Виртемберг, Германија.

— реклама —

Компанијата најави дека намалувањето на бројот на вработени ќе се спроведе на социјално прифатлив начин, а како причини ги посочи неповолните економски услови и големите структурни промени во автомобилската индустрија, објави германскиот весник „Виртшафтсвохе“.

Од „Бош“ предупредуваат дека светското производство на автомобили стагнира, побарувачката во Европа опаѓа, а конкуренцијата се засилува, особено поради производителите од Азија. Дополнително, се менува и пазарот на системи за сопирање, со сè поголема побарувачка за поевтини решенија.

— реклама —

Еден од факторите за намалувањето на капацитетите во Германија е и развојот на електронските системи за сопирање „Brake-by-Wire“, кај кои нема непосредна механичка или хидраулична врска меѓу педалата и сопирачките на тркалата. Овие системи сè почесто се развиваат во соработка со кинески производители на автомобили и во развојните центри на „Бош“ во Кина, што ја намалува потребата од развојни капацитети во Германија.

— реклама —

Во погонот во Абштат работат околу 5.300 лица. Намалувањето ќе го опфати секторот „Vehicle Motion“, кој развива системи за сопирање, софтвер за управување со движењето на возилата, системи за заштита на патниците и автомобилски сензори. Одделението „Cross-Domain Computing Solutions“ и компанијата „Bosch Engineering“ нема да бидат опфатени со мерките.

Во германскиот сектор за мобилност на „Бош“, во различни временски периоди, планирано е укинување на повеќе од 23.000 работни места.

— реклама —

Во првата половина од 2026 година компанијата остварила приходи од 46,4 милијарди евра, што е раст од 3,6 отсто во споредба со истиот период лани. Сепак, растот главно бил резултат на преземања, меѓу кои и бизнисот за греење, вентилација и климатизација од компаниите „Џонсон Контролс“ и „Хитачи“. Прилагодената оперативна добивка пред камати и даноци се намалила од 2,3 на 2,2 милијарди евра.