Бројот на загинати при уривање на станбената зграда во Бруклин се искачи на осум

Осум лица загинаа, а најмалку 17 се повредени при уривање на трикатна станбена зграда во населбата Флетбуш, во Бруклин, Њујорк, САД. Спасувачките екипи и во четвртокот продолжија да трагаат по евентуални преживеани под урнатините.

— реклама —

Несреќата се случила во средата околу 16 часот по локално време. Меѓу повредените има тројца пожарникари, а четири лица се здобиле со повреди опасни за животот. Според властите, најмалку седум деца биле погодени од несреќата, но засега не е познато дали има малолетни меѓу загинатите.

Во спасувачката акција учествувале околу 250 припадници на итните служби, кои работеле во опасни услови. Меѓу спасените е и бремена жена во шестиот месец, по која нејзиниот сопруг со часови трагал по уривањето.

— реклама —

Градоначалникот на Њујорк, Зоран Мамдани, изрази сочувство на семејствата на загинатите и повредените и ја опиша несреќата како огромна трагедија. Тој ги повика граѓаните да се држат подалеку од местото за да им овозможат на спасувачите непречено да работат.

— реклама —

Урнатиот објект се наоѓал непосредно до градилиште на кое претходно бил срушен еднокатен објект. На локацијата се изведувале ископувања, а по несреќата градежната јама била исполнета со тули и дрвена конструкција од урнатата зграда.

Истражителите од Одделот за згради на Њујорк започнале истрага за причините. Според телевизискиот канал NY1, во мај на соседното градилиште биле забележани повеќе неправилности, меѓу кои продолжување на работите и покрај наредбата за нивно запирање, недостиг на соодветна заштита за соседните објекти и непочитување на одобрените градежни планови.

— реклама —

Дали овие пропусти придонеле за уривањето ќе треба да утврди истрагата.