Бугарскиот парламент го одобри барањето на Соединетите Американски Држави за користење на воздухопловната база Безмер како логистичка поддршка за американските операции на Блискиот Исток.
Одлуката беше усвоена со 136 гласа „за“, 13 „против“ и двајца воздржани пратеници. Со неа се овозможува од 24 јули до 1 октомври во базата да бидат распоредени до осум американски авиони-танкери KC-135, до 250 припадници на персоналот и придружна опрема, без потреба од дополнителни парламентарни одобренија.
Воздухопловната база Безмер се наоѓа околу 260 километри југоисточно од Софија и, согласно со билатералниот одбранбен договор меѓу Бугарија и САД од 2006 година, ја користат двете држави. За секоја нова намена на базата е потребна согласност од бугарскиот парламент.
Распоредувањето на американските сили следува по барање на Амбасадата на САД во Софија, додека од американска страна засега нема официјален коментар.
Во пресрет на гласањето, бугарскиот премиер Румен Радев изјави дека е „категорично исклучено“ од територијата на Бугарија да се изведуваат воени операции на Блискиот Исток. Тој нагласи дека американските авиони ќе се користат исклучиво за логистички мисии и дополнување гориво во воздух надвор од бугарскиот воздушен простор.
Министерот за одбрана Димитар Стојанов истакна дека се преземени сите неопходни мерки за Бугарија да не биде вовлечена во евентуален конфликт, додавајќи дека од стратешкиот партнер се добиени гаранции за намалување на ризиците по националната безбедност.
Одлуката е донесена во период кога дел од европските сојузници изразуваат резерви кон користењето на нивните воени бази за поддршка на американските операции поврзани со конфликтот со Иран. Според бугарските власти, улогата на базата Безмер ќе остане ограничена исклучиво на логистичка поддршка и од бугарска територија нема да се изведуваат напади.
