Бугарија истражува дали експлозијата во магацин за оружје била саботажа

Бугарските власти отворија истрага по експлозијата и пожарот во магацин за оружје во централниот дел на земјата. Инцидентот се случил во текот на ноќта во близина на селото Царева Ливада, а според првичните информации нема повредени.

Бугарскиот министер за внатрешни работи Иван Демерџиев изјави дека пожарот е ставен под контрола и оти надлежните работат на утврдување на причините за експлозијата.

— реклама —

Демерџиев посочи и на можна поврзаност со пожарот што во август избувнал во друг објект на компанијата „ЕМКО“, која произведува и складира оружје и муниција.

— реклама —

„Постои занемарување на условите под кои се складираат експлозивот и муницијата“, изјави министерот, додавајќи дека безбедносните мерки не смеат да се занемаруваат.

Опозициските партии во Бугарија изразија сомнежи дека пожарите би можеле да бидат поврзани со саботажи на Москва, насочени кон компании кои произведуваат оружје за Украина. Демерџиев не ги коментираше овие тврдења.

— реклама —

Во изминатата деценија се регистрирани неколку експлозии во објекти поврзани со „ЕМКО“, компанија која ја снабдува Украина со вооружување.

— реклама —

Сопственикот на компанијата, Емилијан Гебрев, во 2015 година преживеа обид за атентат. Во врска со случајот беа обвинети тројца руски државјани, за кои постојат сомнежи дека се припадници на руската воена разузнавачка служба.

Истрагата за најновиот инцидент продолжува, а бугарските власти треба да утврдат што ја предизвикало експлозијата и дали постојат пропусти во безбедносните процедури.