Бугарската фондација „Македонија“ ја откажа најавената двочасовна мирна блокада на трите гранични премини меѓу Бугарија и Македонија, која требаше да се одржи на 21 јуни.
Одлуката ја соопшти претседателот на фондацијата, Виктор Стојанов, кој информираше дека протестот е повлечен по разговори со претставници на бугарското Министерство за надворешни работи и со бугарскиот амбасадор во Скопје, Жељазко Радуков.
Стојанов посочи дека организаторите ги известиле надлежните институции за откажувањето на протестот со цел да се избегнат непотребни тензии во пограничните подрачја и да не се ангажираат дополнителни полициски ресурси.
Тој изјави дека фондацијата вообичаено ги координира своите активности со институциите и оцени дека во моментот ваков вид протест, кој би подразбирал и краткотрајна блокада на границата, би бил контрапродуктивен.
Фондацијата најави дека своите идни активности поврзани со поддршката на бугарската заедница во Македонија ќе ги претстави на прес-конференција во Софија.
Претходно, Стојанов изјави дека протестот бил замислен како израз на незадоволство од, како што тврдеше, односот на властите во Скопје кон лицата кои се изјаснуваат како Бугари. Според организаторите, блокадата требаше да трае 120 минути и да има исклучиво мирен карактер.
Во меѓувреме, бугарскиот амбасадор во Скопје, Жељазко Радуков, преку објава на социјалните мрежи повика да не се блокираат граничните премини и патиштата меѓу двете земји. Тој нагласи дека несогласувањата треба да се изразуваат на конструктивен и европски начин, преку дијалог, културна соработка и продлабочување на контактите меѓу граѓаните од двете држави.
