Бугарската шефица на дипломатијата: Нема политичка волја во Скопје за спроведување на европскиот компромис

Бугарската министерка за надворешни работи Велислава Петрова тврди дека кај власта во Скопје не постои политичка волја за спроведување на обврските преземени со европскиот компромис од 2022 година и оценува дека конфронтацијата и антибугарската реторика не ја приближуваат Македонија до Европската унија.

Во интервју за бугарскиот весник „Стандард“, Петрова вели дека темата за Македонија ѝ е лично блиска, бидејќи е родена во Сандански и израснала во близина на границата.

— реклама —

„Од прва рака знам колку е важно да имаш добри односи со соседите и колку е погубно кога недостигаат добрососедски односи“, вели Петрова.

Таа потсетува дека во 2022 година, како заменик-министерка, била дел од тимот што ја застапувал бугарската позиција пред Европската унија.

Според неа, европскиот компромис од 2022 година бил значаен успех за Софија бидејќи бил поддржан со широк меѓуинституционален консензус во Бугарија.

— реклама —

„Многу добро знам колку тешко успеавме да постигнеме политички консензус кај нас и да ги убедиме нашите партнери да ја прифатат нашата позиција“, вели Петрова.

Таа тврди дека од тогаш до денес нема доволна политичка волја во Скопје да почне спроведувањето на договореното.

— реклама —

„Ние не поставуваме нови услови и не бараме ништо надвор од веќе договорената европска рамка“, вели бугарската министерка.

Според неа, довербата меѓу двете земји може да се гради само преку исполнување на преземените обврски и конструктивен пристап.

„Конфронтацијата и антибугарската реторика не ја приближуваат Северна Македонија до ЕУ – тие само водат кон губење драгоцено време“, вели Петрова.

— реклама —

Во интервјуто таа се осврнува и на случајот со Ива Михајлова, оценувајќи дека односот на македонските власти во тој случај „не дава голема надеж“ дека има сериозен напредок во позитивна насока.

Станува збор за ставови и оценки на бугарската министерка за надворешни работи, изнесени во интервју за бугарски медиум.