Двајца пратеници од бугарската партија „Преродба“ објавија фотографии со кои потврдија дека присуствувале на судското рочиште во Кочани за 23-годишната Ива Михајлова, која има македонско и бугарско државјанство.
Според телевизија Телма, станува збор за Крсто Врачев и Ангел Георгиев, иако, како што наведува медиумот, тие имаат важечка забрана за влез во Македонија врз основа на судска одлука.
За време на судењето, двајцата упатија критики за, како што рекоа, состојбата со владеењето на правото во Македонија и обвинија дека Михајлова, која се изјаснува како Бугарка, е неправедно третирана.
Телма потсетува дека Врачев и Георгиев се меѓу 27 лица опфатени со пресуда на Основниот суд во Битола, со која им е изречена едногодишна забрана за влез во Македонија, бидејќи во јуни минатата година нелегално ја преминале македонско-грчката граница и нелегално престојувале во земјата.
Покрај забраната за влез, тие биле казнети и со парични казни во износ од 50 до 230 евра.
