Според извештајот на Светскиот економски форум, целосна родова еднаквост на глобално ниво би можела да биде постигната за околу 120 години. Иако јазот меѓу жените и мажите е намален на најниско ниво досега и достигнува 69,2 отсто, анализата предупредува дека досегашниот напредок не е гарантиран.
Извештајот за глобалниот родов јаз за 2026 година опфаќа 145 економии и ги анализира учеството на пазарот на трудот, образованието, здравството и политичката застапеност. Податоците покажуваат дека жените денес се присутни на високи раководни позиции во јавниот сектор и економијата повеќе отколку во претходните години.
Сепак, застапеноста на жените на највисоките политички функции во последната деценија бележи назадување. Уделот на земјите предводени од жени го достигнал врвот во 2022 година, но потоа се намалил на ниво слично на она од 2016 година.
Извршната директорка на Светскиот економски форум, Саадија Захиди, оцени дека родовата еднаквост е важна за економскиот раст, но дека напредокот не се случува автоматски. Според неа, владите и работодавачите треба побрзо да ги применуваат политиките што покажуваат резултати и да пристапат поинаку кон развојот и користењето на човечкиот потенцијал.
Жените и понатаму се недоволно застапени на позициите со најголемо економско и политичко влијание. Тие заземаат помалку од една петтина од местата на главни извршни директори, а само една од десет министерски позиции што ги извршуваат жени е оценета како позиција со големо влијание. Иако бројот на жени министри од 2008 година се зголемил за 26 отсто, нивното учество на највлијателните позиции останало речиси непроменето.
Нееднаквоста е забележлива и во областа на вештачката интелигенција. И покрај инвестициите од речиси еден билион долари во развојот на оваа технологија, жените сочинуваат помалку од една петтина од инженерите за вештачка интелигенција.
На врвот на глобалната листа и 17-та година по ред е Исланд, со затворен родов јаз од 93 отсто. Следуваат Финска и Норвешка, додека Намибија е на четвртото место. Обединетото Кралство е петто, Австралија осма, а Германија деветта.
САД се на 47. место, пет позиции подолу во споредба со претходната година, со 74,9 отсто затворен родов јаз. Хрватска е на 48. место, што претставува напредок од 16 позиции.
Индија е на 131. место со 64,5 отсто затворен родов јаз, додека Кина напредувала за седум места и сега е на 96. позиција, со 69,9 отсто.
Значителен напредок е регистриран во повеќе африкански и латиноамерикански земји. Намибија со 84,5 отсто е лидер во супсахарска Африка, додека Кенија напредувала за 33 места, Гана за 32, а Ангола за 30 позиции. Меѓу земјите со значителен напредок се издвојуваат и Гватемала и Чешка.
