Скандал кој со месеци ја потресуваше норвешката јавност доби судска разрешница, откако Мариус Борг Хоиби, 29-годишниот син на норвешката принцеза Мете-Марит, беше осуден на четири години затвор за силување.
Според пресудата на Окружниот суд во Осло, Хоиби е прогласен за виновен по две точки од обвинението за силување, додека е ослободен од обвиненијата за уште две наводни силувања. Покрај тоа, тој е осуден и за повеќе други кривични дела, пренесува Би-Би-Си.
Тричлена судска комисија ја донесе одлуката, а Хоиби не присуствуваше лично на изрекувањето на пресудата во судницата на Окружниот суд во Осло, туку ја следеше постапката преку видеоврска.
За време на судењето, обвинителството побара казна затвор од седум години и седум месеци, додека неговите адвокати се залагаа за значително поблага казна од 18 месеци и најавија можност за поднесување жалба.
Четирите обвиненија за силување се однесуваат на периодот од 2018 до ноември 2024 година. Еден од наводните случаи, според обвинението, се случил во официјалната резиденција на неговите родители на имотот Скаугум.
Во еден од случаите од 2023 година, Хоиби бил обвинет дека имал сексуален однос со жена додека таа спиела. Останатите случаи се однесувале на сексуални напади врз жени со попреченост, што според норвешкото законодавство исто така се квалификува како силување.
Единствената жртва чиј идентитет може јавно да се објави е неговата поранешна девојка и инфлуенсерка Нора Хаукланд. Нејзините обвинувања дека била удирана, клоцана и давена од Хоиби се дел од предметот што ја потресе норвешката јавност и повторно ја отвори дебатата за насилството врз жените и одговорноста, без оглед на општествениот статус на обвинетите.
