Претседателот на СДСМ, Венко Филипче, на седницата на Националниот совет за евроинтеграции оцени дека Македонија заостанува на патот кон Европската Унија, додека другите земји кандидати бележат напредок во пристапниот процес.
Филипче посочи дека Европската Унија во последниот период јасно го ставила проширувањето меѓу своите приоритети и дека тоа, според него, се потврдува со конкретните чекори што ги презема кон земјите кандидати.
Тој истакна дека Албанија, Црна Гора, Молдавија и Украина веќе напредуваат во преговорите со Унијата, додека Македонија, како што рече, останува единствената земја кандидат која сè уште нема отворено ниту едно преговарачко поглавје.
„Секој ден гледаме како регионот оди напред. За жал, ние стоиме во место. Кога регионот оди напред, а ние не правиме ништо, тоа значи и назадување. Ќе дојде период кога повеќе нема да можеме да се споредуваме со никого, затоа што луѓето нема да ја гледаат својата иднина овде“, изјави Филипче.
Во своето обраќање тој повтори дека, според него, намерното запирање на европскиот пат отвора сериозни прашања за иднината на државата и додаде дека институциите на Европската Унија преку своите политики и финансиски одлуки јасно покажуваат дека проширувањето е еден од нивните клучни приоритети.
Филипче оцени дека доколку Македонија продолжи да стагнира, ризикува дополнително да заостане зад земјите од регионот и да ги пропушти можностите што ги нуди европскиот интегративен процес.
