Четири лица биле лишени од слобода во Тетовско поради управување возило без возачка дозвола или под дејство на алкохол. По консултација со јавен обвинител, сите возила биле одземени.
Од МВР информираат дека на 8 септември биле лишени од слобода три лица кои управувале возила без да поседуваат возачка дозвола.
Е.Ј. (28) од Скопје бил сопрен во 20:35 часот кај клучката Групчин, додека управувал „фолксваген голф“ со тетовски регистарски ознаки.
А.И. (28) од село Гајре, Тетовско, бил сопрен во 21:35 часот во село Долно Палчиште со автомобил „бмв“, исто така со тетовски регистарски ознаки.
Ф.Ј. (24) од Тетово била сопренa во 23:20 часот на улицата „Маршал Тито“ во Тетово, додека управувала автомобил „бмв“ без возачка дозвола.
Во одделен случај, Д.С. (41) од село Одри, Тетовско, бил сопрен во 20:25 часот на регионалниот пат Брвеница–Тетово. При контролата било утврдено дека управувал автомобил „ауди“ со 1,58 промили алкохол во крвта.
Д.С. бил лишен од слобода и задржан во полициска станица. По целосното документирање на случаите, против сите лица ќе следуваат соодветни поднесоци.
