Четворица повредени во Виница: Со 1,82 промили алкохол учествувал во несреќа во Виница, па избегал

Возач на возраст од 24 години, кој учествувал во сообраќајна несреќа во Виница, го напуштил местото на настанот, по што полицијата го пронашла и го уапсила. При проверката било утврдено дека управувал автомобил со 1,82 промили алкохол во крвта. Во несреќата биле повредени четири лица, од кои едно се здобило со тешки телесни повреди.

— реклама —

Според информациите од Министерството за внатрешни работи, несреќата се случила на 22 октомври, околу 20:45 часот, на крстосницата меѓу улиците „Маршал Тито“ и „Ленинова“ во Виница.

Во судирот учествувале два автомобили „ауди“ со винички регистарски ознаки. Едниот бил управуван од Д.П. (42) од Виница, а другиот од П.П. (24) од селото Лески, Виничко, кој по несреќата го напуштил местото.

— реклама —

Со тешки телесни повреди се здобил Ј.П. (58) од Виница, кој бил сопатник во автомобилот управуван од 42-годишниот возач. Телесни повреди добиле и возачот Д.П., како и сопатниците И.П. (39) и Е.П. (54).

— реклама —

Повредите биле констатирани во Итната медицинска помош во Кочани и во Клиничката болница во Штип.

По преземените мерки, полициските службеници го пронашле 24-годишниот возач и го лишиле од слобода. При извршените проверки било утврдено дека возилото го управувал под дејство на алкохол, со измерени 1,82 промили алкохол во крвта.

Увид на местото извршила екипа на ОВР Виница, а од МВР најавуваат дека по целосното документирање на случајот против П.П. ќе биде поднесена соодветна пријава.