Од денеска во Црна Гора стапија во сила измените на Законот за безбедност во сообраќајот, со кои се воведуваат построги правила за возачите на електрични тротинети, младите возачи и родителите. За прекршување на дел од одредбите се предвидени казни до 600 евра.
Според новите правила, на деца помлади од 16 години им е забрането да управуваат со електрични тротинети на јавните патишта. Родителите или старателите кои ќе им дозволат да возат тротинет на јавен пат може да бидат казнети со парична казна од 150 до 400 евра.
Со измените за првпат подетално се регулира користењето на лесните електрични возила, а воведени се и нови ограничувања за возачите помлади од 21 година, како и построги казни за повеќе сообраќајни прекршоци.
Законот предвидува дека забраната важи само за јавните патишта, додека возењето на приватен имот или на површини што немаат статус на јавен пат не е опфатено со овие правила.
