Д-р Агаи за органодарителство: „Кога еден живот завршува, друг може да добие нов почеток“

Директорот на Клиниката за неврохирургија, д-р Љуљзим Агаи, упати порака за поддршка на националната кампања за органодарителство, која се реализира под мотото „Органодарителството ѝ дава највисока смисла на човечноста“.

— реклама —

Во своето видео-обраќање, Агаи истакна дека медицинските тимови секојдневно се борат за животите на пациентите, но дека понекогаш болеста е посилна од сите напори и можности на лекарите.

— реклама —

„Се наоѓаме на нашата интензивна нега, каде што секојдневно се бориме за животите на нашите пациенти и многу пати успеваме во тоа, но понекогаш болеста е посилна од нас, посилна од нашите можности. Со тоа што завршува животот, може да отпочне еден нов живот доколку дадеме шанса на проектот за трансплантација на органи“, порача д-р Агаи.

Тој нагласи дека органодарителството претставува еден од најхуманите чинови и може да им даде нова надеж и нова шанса на луѓето кои чекаат трансплантација.

— реклама —

„Овој хуман чин на трансплантација на органи може да спаси нов живот доколку имаме доволно информации и доколку имаме големо срце да му помогнеме на некого“, додаде директорот на Клиниката за неврохирургија.

— реклама —

Кампањата има за цел да ја подигне јавната свест за значењето на органодарителството и да поттикне поголема информираност за можностите што ги нуди трансплантацијата во спасувањето човечки животи.