По проспиената ноќ во која вестите за апсењето на двајцата осомничени за рекет и шпекулациите за инволвираност во скандалот и на лица од правосудството се менуваа како на лента, и политичките партии се јавија со оценки за случајот.
За владејачката СДСМ, случајот против осомничените Бојан Јовановски и Зоран Милевски е доказ за постоење на „заштитен механизам на релација граѓани, обвинителство и МВР кој го штити општеството и кој може да се справи со евентуални случаи на корупција.
„Државата изгради институции и создаде систем коишто се борат против корупцијата и криминалот. СДСМ ги охрабрува и ги повикува надлежните институции да спроведат длабинска и независна истрага, да постапуваат исклучиво според законите со крајна цел владеење на правото во нашата земја“, се наведува во партиското соопштение.
Нивниот коалициски партнер, ДУИ преку портпаролот и вицепремиер Бујар Османи соопшти дека „е разочаран од она што се случи“, но смета дека потребата од СЈО останува.
„ДУИ е најголем непријател на селективната правда и затоа го предложи законот за ветинг и во политиката и во судството. ДУИ останува на ставот дека РСМ има потреба од институција која ќе биде насочена на борба против корупцијата на високо ниво, особено во политиката. Тоа е барање на ЕУ и на граѓаните и со таков став одиме на лидерската средба. Каква институција, во која форма и со кој кредбилитет тоа ќе се одлучи на лидерската средба“, изјави Османи.
Опозициската ВМРО-ДПМНЕ бара да се обелодени идентитетот и на другите вмешани во скандалот, во прв ред името на јавниот обвинител.
„Апсењето на Боки 13 е само дел од рекетарската приказна на власта. Тие што имаа среќа да не го почувствуваат на своја кожа рекетот на власта, читаа како функционери на СДСМ блиски до Заев заедно со медиумски сопственик се заканувале на фирми и бизнисмени дека доколку не ја платат побараната сума, утре може да ги снајде некое злодело“, обвинува ВМРО – ДПМНЕ.
Пратеникот на ВМРО-ДПМНЕ Антонио Милошоски изјави дека „главниот нарачател“ во случајот „Рекет“ е надвор од СЈО и е дел од „владејачката структура“. Лидерот на ВМРО-ДПМНЕ побара апсење на Јанева.