Дали Славјанка Петровска е следна за „шут карта“ од СДСМ?

Пратеничката и поранешна министерка за одбрана Славјанка Петровска, во средата беше една од поканетите кои присуствуваа на настанот „Разговори за иднината во 12:05“. На настанот беа членови на СДСМ од различни генерации, граѓански активисти, аналитичари, професори и правници.

— реклама —

„Органите и телата на СДСМ следната недела ќе расправаат за учеството на Петровска“, ова го соопшти претседателот на СДСМ, Венко Филипче, одговарајќи на новинарско прашање дали ќе бара одговорност од Петровска поради нејзиното присуство на настанот и дали разговарал со неа за причините поради кои јавно ги критикува состојбите во партијата.

— реклама —

Во изминатиот период Петровска неколкупати јавно предупреди дека партијата мора да се менува и изјави дека „ако не се промениме, ќе исчезнеме“.

На новинарски став дека на дебатата учествувале и новинари, аналитичари и јавни личности кои важат за критичари на актуелната власт, Филипче одговори дека не ги смета за непријатели и дека е отворен за дебата, но нагласи дека политичките несогласувања треба да се решаваат во рамките на партијата.

— реклама —

Филипче платформата не ја гледа како независна иницијатива, туку како политички проект зад кој, според него, стои премиерот Христијан Мицкоски.

„Јас не би ги коментирал проектите на Христијан Мицкоски. Жал ми е што дел од другарите се откажаа од партијата, од својата идеологија. Тоа е веќе видено. Тоа е претходниот проект ЗНАМ, кој постепено пропаѓа. Ист е организаторот и ист е финансиерот“, рече Филипче.