Дамките од сладолед на прв поглед изгледаат безопасно, но всушност се меѓу најтешките за отстранување, особено ако се исушат или ако не се третираат правилно. Експертите предупредуваат дека дури и кога дамката привидно ќе исчезне, по сушењето може да се појави жолтеникав или кафеав прстен.
За успешно чистење се препорачува употреба на течен детергент за перење и ладна вода. Првиот чекор е ткаенината да се потопи во ладна вода пет до десет минути, а кај исушени дамки и подолго. Топла вода не се препорачува, бидејќи може дополнително да ја фиксира дамката во ткаенината.
Доколку трагите останат, во дамката треба нежно да се втриe течен детергент за перење или средство за миење садови, а потоа облеката повторно да се остави во вода на собна температура околу половина час. По плакнењето, се нанесува средство за отстранување дамки, кое треба да делува неколку минути пред повторно плакнење.
Постапката се повторува сè додека дамката целосно не исчезне. Дури потоа облеката треба да се испере според упатствата за конкретниот материјал.
Кај исушените дамки, најпрво треба внимателно да се отстранат остатоците од сладолед со лажица или тап нож, а потоа да се продолжи со третманот со детергент и ладна вода.
Кога станува збор за тапациран мебел, најважно е вишокот сладолед да се впие без да се размачка. Потоа се користи раствор подготвен од една лажица средство за миење садови и две шолји ладна вода. Со сунѓер или чиста бела крпа внимателно се третира дамката, а потоа местото се суши со впивање на течноста.
Во некои случаи може да помогне и газирана вода, која спречува дамката дополнително да се впие и да стане потешка за отстранување.
Според советите на експертите, клучот за успешно чистење е брзата реакција и избегнувањето на сушење на облеката или мебелот додека не бидете сигурни дека дамката е целосно отстранета.
