Даниела Димовска и официјално ја презема функцијата претседателка на Основниот кривичен суд Скопје, откако денеска пред Судскиот совет даде свечена изјава. Таа најави дека ќе продолжи со досегашното темпо на работа, со приоритет на ажурноста, намалувањето на старите предмети и поголемата транспарентност на судот.
Димовска во изминатите 14 месеци беше вршителка на должноста претседателка на судот. Во тој период, како што посочи, приливот на предмети бил намален за 4.000, бројот на старите предмети за 53 проценти, а годинава немало ниту еден застарен предмет. Таа најави и завршување на процесот за целосна анонимизација на судските одлуки, како и нова веб-страница на судот.
Како најголем предизвик го посочи недостигот од кадар. Според неа, судот во моментов има 130 вработени помалку во споредба со периодот од пред неколку години, поради што најголемиот товар паѓа врз судската администрација.
Во однос на довербата во судството, Димовска оцени дека таа може да се подобри со законити, образложени и разбирливи одлуки, како и со поголема отвореност кон јавноста.
Таа порача дека нејзината досегашна работа е најдобра потврда за нејзината независност и нагласи дека во судот работела професионално, транспарентно и без притисоци или привилегирање на која било страна.
Димовска се осврна и на истрагата за нејзиниот брат, поврзана со случајот „Пулс“, оценувајќи дека тоа не може да влијае врз нејзината работа ниту да биде пречка во извршувањето на функцијата.
За претседателка на Основниот кривичен суд Скопје Димовска беше избрана на 8 јули годинава, по спроведен јавен оглас. На истата седница свечени изјави дадоа и новоизбран судија на Основниот суд Струга и шестмина судии на Апелациониот суд Штип.
