Рускиот академик Владислав Лекторски, претседател на Научниот совет за методологија на вештачката интелигенција и когнитивни истражувања при Руската академија на науките, предупреди дека прекумерната употреба на системи за вештачка интелигенција, како што е ChatGPT, може негативно да влијае врз способноста на децата за самостојно и критичко размислување.
Според Лекторски, ваквата опасност веќе може да се забележи кај дел од учениците, кои сè почесто користат алатки базирани на вештачка интелигенција за да добијат готови одговори на различни прашања, наместо самите да доаѓаат до решенија.
„Таква опасност навистина постои. Таа е поврзана со образовниот систем, каде што учениците се потпираат на системи како ChatGPT и други платформи за да најдат одговори на речиси сè. На тој начин ја губат способноста да размислуваат самостојно“, изјавил Лекторски.
Тој нагласил дека современото образование не треба само да пренесува знаење, туку и да ја развива способноста за критичко размислување и анализа.
Како пример, академикот навел предупредување од еден образовен работник дека ученик кој безрезервно ѝ верува на вештачката интелигенција може да прифати и очигледно неточни информации.
„Ако студентот е навикнат слепо да ѝ верува на вештачката интелигенција, тогаш, ако таа му каже дека два пати два се пет, тој ќе поверува дека тоа е вистина. Тоа е ужасна работа и не смее да се дозволи“, истакнал Лекторски.
Според него, неопходно е јасно да се дефинира каде и како треба да се користат можностите на вештачката интелигенција, а каде нејзината употреба мора да биде ограничена, особено во образованието.
