Децата во Германија ќе добиваат пари за пензија уште од шест години – еве колку може да соберат до 65 години

Германската влада предлага државата да издвојува по 10 евра месечно за секое дете од шестата до 18-годишна возраст, со цел уште од раното детство да се создава почетен капитал за пензија.

Предлогот, познат како „пензија за ран почеток“ (Frühstartrente), го претставил германскиот министер за финансии Ларс Клингбајл во Бундестагот. Средствата би се уплаќале наменски на инвестициски сметки.

— реклама —

Според проценките на германската влада, благодарение на сложената камата, само со државните уплати до пензионирањето на 65 години на сметката би можеле да се соберат околу 53.000 евра. Доколку родителите или бабите и дедовците дополнително уплаќаат по 20 евра месечно, сумата би можела да достигне околу 160.000 евра.

Мерката би почнала ретроактивно од 1 јануари 2026 година за децата родени во 2020 година и подоцна. Од 2027 година, секоја генерација би се вклучувала во системот кога ќе наполни шест години.

— реклама —

По навршувањето на 18 години, корисникот би можел самостојно да продолжи со уплатите на инвестициската сметка, додека средствата со државните поттикнувања би се исплаќале по навршувањето на 65 години.

— реклама —

Германската влада планира и стратегија за финансиско образование, со која младите од најрана возраст би се запознавале со инвестирањето на пазарот на капитал.

Предлогот предизвика поделени реакции во Бундестагот. CDU/CSU го поддржаа моделот, додека АфД и Зелените упатија критики. Од АфД сметаат дека 10 евра месечно се премалку и предлагаат 100 евра од раѓањето, додека Зелените го критикуваат исклучувањето на децата родени пред 2020 година.

По првата расправа во Бундестагот, конечната парламентарна процедура се очекува наесен, а планирано е законот да стапи во сила на почетокот на следната година.

Сличен модел најавува и Австрија, која планира од 2027 година да воведе еднократен поттик од 500 евра за секое новородено дете, без оглед на државјанството.