Селекторот на канадската фудбалска репрезентација, Џеси Марш, го објави конечниот список од 26 фудбалери за претстојното Светско првенство, а меѓу повиканите е и капитенот Алфонсо Дејвис, кој беше под знак прашалник поради повреда на тетивата.
Марш изрази задоволство од составот што ќе ја претставува Канада на Мундијалот, оценувајќи дека станува збор за најсилната генерација што земјата ја имала досега.
„Имаме најдобра група од 26 играчи што оваа земја некогаш ја собрала. Не се сите во идеална форма, но се блиску до тоа. Верувам дека ќе имаме силен тим, подготвен за првиот натпревар, и дека ќе бидеме сè подобри како што ќе одминува турнирот“, изјави Марш.
На списокот се најдоа и голем број интернационалци, меѓу кои Џонатан Дејвид, Кајл Ларин, Стивен Јустакио и Тејџон Бјукенан.
Канада ќе настапи во групата Б, заедно со репрезентациите на Босна и Херцеговина, Катар и Швајцарија.
Светското првенство ќе се одржи од 11 јуни до 19 јули во Канада, Соединетите Американски Држави и Мексико, а првиот предизвик за Канаѓаните ќе биде дуелот против Босна и Херцеговина.
