Денес е Свети Димитриј – солунскиот чудотворец и заштитник на градот

Светиот великомаченик Димитриј, познат и како чудотворец и заштитник на Солун, потекнувал од благородно и побожно семејство. Се родил во Солун како единствено дете на родителите кои долго време немале пород и со молитва го измолиле неговото раѓање. Поради тоа, уште од најрана возраст бил воспитуван со особено внимание и грижа.

Неговиот татко бил солунски војвода, а по неговата смрт Димитриј ја презел неговата должност. Царот Максимијан, познат како гонител на христијаните, му наредил да ги прогонува и уништува христијаните во Солун. Но Димитриј не ја исполнил царската наредба. Напротив, јавно ја исповедал христијанската вера и го проповедал Христовото учење.

— реклама —

Кога дознал за неговото постапување, Максимијан се разгневил. При едно враќање од воен поход, царот дошол во Солун и го повикал Димитриј за да го испита за неговата вера. Светителот отворено признал дека е христијанин и го осудил идолопоклонството на царот. Поради тоа бил фрлен во затвор.

Свесен за судбината што го очекувала, Димитриј целиот свој имот му го доверил на својот верен ученик Луп, со задача да го подели на сиромашните. Во затворот заминал со радост, подготвен да пострада за Христос. Таму му се јавил ангел Божји и му упатил зборови на охрабрување: „Мир на тебе, страдалнику Христов. Биди храбар!“

— реклама —

По неколку дена, царот испратил војници да го убијат. Тие го затекнале Димитриј на молитва и го прободеле со копја. Христијаните тајно го презеле неговото тело и чесно го погребале. Според преданието, од неговите мошти започнало да истекува исцелително миро, преку кое многу болни оздравеле.

— реклама —

Над гробот на светителот најпрво била изградена мала црква. Подоцна, еден илирски војник по име Леонтиј, кој страдал од неизлечлива болест, се помолил на моштите на свети Димитриј и оздравел. Во знак на благодарност, тој изградил поголема црква на местото на старата.

Свети Димитриј, според преданието, двапати му се јавил на Леонтиј. Кога царот Јулијан посакал моштите да ги пренесе од Солун во Цариград, од гробот се појавиле огнени искри, а се слушнал и глас: „Застанете и не гибајте!“

— реклама —

Така моштите на светителот останале во Солун, каде што и денес се почитува како негов заштитник. Според црковното предание, свети Димитриј повеќепати го спасувал градот од големи опасности, а неговите чудотворни дела се многубројни.

Русите, исто така, го почитуваат како покровител на Сибир, територија што ја освоиле и ја присоединиле кон Русија во 1581 година.