Денеска се одбележува празникот на светиот апостол Тома – ученикот чиј сомнеж ја потврдил вистината за Христовото воскресение

Православните верници денеска го одбележуваат споменот на светиот апостол Тома, еден од дванаесеттемина големи Христови апостоли, познат по сомнежот во Христовото воскресение, преку кој била потврдена вистината за овој чудесен настан.

Откако воскреснатиот Господ повторно им се јавил на учениците, му се обратил на Тома со зборовите: „Дај ја раката своја и стави ја во ребрата Мои; и не биди неверлив, но верлив!“ Тогаш Тома извикал: „Господ мој и Бог мој!“ (Јован 20).

— реклама —

По слегувањето на Светиот Дух, кога апостолите одредувале каде ќе проповедаат, на Тома му паднала ждрепката да замине во Индија. Иако најпрвин се нажалил поради далечниот пат, Господ му се јавил и го охрабрил. Во Индија апостолот многумина, и богати и сиромашни, ги привел кон Христовата вера, ја основал Црквата и поставил свештеници и епископи.

— реклама —

Меѓу оние што ги обратил во христијанството биле и Тертијана и Мигдонија, сестри и сопруги на двајца индиски кнезови. Поради верата и одбивањето да продолжат да живеат со своите сопрузи по крштевањето, тие претрпеле страдања, а потоа биле отпуштени од своите мажи. Остатокот од животот го поминале во богоугоден подвиг.

Апостолот во верата ги привел и Дионисиј и Пелагија. Тие не стапиле во брачен соживот, туку му се посветиле на духовниот подвиг. Пелагија пострадала маченички за верата, додека Дионисиј бил поставен за епископ.

— реклама —

Сепак, проповедничката мисија на свети Тома завршила со маченичка смрт. Кнезот Муздиј, сопруг на Тертијана, чија жена и син апостолот ги крстил, го осудил на смрт. Петмина војници го прободеле со пет копја, по што свети Тома ја предал својата душа во рацете на Христа.

Според црковното предание, пред смртта на апостолот му се случило и чудесно пренесување на погребот на Пресвета Богородица. Бидејќи пристигнал доцна, Тома зажалил и побарал да се отвори нејзиниот гроб. Кога го отвориле, телото на Богородица не било таму, зашто Господ ја зел во небесните живеалишта.

Така, апостолот кој со својот сомнеж придонел за потврдување на Христовото воскресение, според преданието, преку своето задоцнето пристигнување открил и уште една тајна поврзана со прославувањето на Пресвета Богородица.