Денеска се одбележува споменот на светиот маченик Нестор

Во времето кога свети Димитриј Мироточивиот страдал за христијанската вера, во Солун живеел младиот Нестор, кој бил негов ученик и преку него го запознал христијанството.

Во тоа време царот Максимијан организирал крвави гладијаторски борби за забава на народот. Негов омилен борец бил Лиј, човек со огромен раст и натчовечка сила, кој ги предизвикувал другите на борба и безмилосно ги убивал. За неговите настапи била изградена посебна платформа, под која биле поставени остри копја. Секој што ќе го изгубел двобојот со Лиј бил фрлан врз нив и умирал во страшни маки.

— реклама —

Меѓу жртвите имало и многу христијани, кои биле присилно доведувани на борилиштето кога немало доброволци што би му се спротивставиле на гладијаторот. Гледајќи ги страдањата на своите соверници, Нестор решил да застане на патот на суровиот Лиј.

— реклама —

Пред да ја прифати борбата, младиот христијанин отишол во затворот кај свети Димитриј и побарал благослов. Светителот го прекрстил и му дал благослов, но истовремено му претскажал дека ќе го победи Лиј, но дека и самиот ќе пострада за Христос.

Кога Нестор се појавил на борилиштето, царот и насобраниот народ биле убедени дека младиот човек нема шанси против силниот гладијатор. Но Нестор се помолил со зборовите: „Боже Димитриев, помогни ми!“ Потоа, со Божја помош, успеал да го совлада Лиј и да го фрли врз острите копја, каде што џиновскиот борец ја дочекал смртта.

— реклама —

По победата, народот извикал: „Голем е Бог на Димитриј!“

— реклама —

Царот Максимијан, разгневен поради смртта на својот миленик и посрамотен пред народот, наредил Нестор да биде погубен со меч, а свети Димитриј да биде убиен со копја.

Така, во 306 година, светиот маченик Нестор го завршил својот земен живот и го примил маченичкиот венец, преселувајќи се во Царството небесно.