Денис Прешова жестоко за Судскиот совет: Да формираме „Судо-шпед“ наместо вакво тело

Универзитетскиот професор Денис Прешова остро реагираше откако во јавноста се појавија информации дека Судскиот совет побарал од Собранието толкување на одредби од новиот Закон за Судскиот совет, поврзани со престанок на мандат на член поради исполнување услови за пензија.

Според Прешова, доколку е точно дека Судскиот совет се обратил со писмо до Собранието за толкување на законските одредби, а Собранието возвратило со свое толкување, тоа претставува сериозен показател за состојбите во правосудниот систем.

„Тогаш дајте да не се зафркаваме и да го укинеме ова тело и да формираме Агенција за судство на чело со некој директор или, подобро, нешто налик на некое тело со јавни овластувања наречено Судо-промет, Интер-суд-екс или Судо-шпед, кое ќе биде друштво со ограничени правни знаења и одговорност за промет со судски интегритет, судска трговија и тезгарење“, напиша Прешова.

Тој прашува како е можно институција составена од судии и правници да не може самостојно да ги толкува законските одредби што ја регулираат нејзината работа.

„Чуму ни седат таму ‘врвни’ судии и ‘истакнати’ правници ако ова се случува и тие не се способни да ги толкуваат одредбите на Законот за Судскиот совет. Немаме потреба од ваков Судски совет“, наведува Прешова.

Во објавата тој го критикува и Собранието, оценувајќи дека наместо автентично толкување, кое и онака често било предмет на критики, сега се појавува нова практика што иронично ја нарекува „епистоларно толкување“.

„Мислевме автентичните толкувања се чудовишта од минатото, а тек ова… епистоларно толкување“, додава Прешова.