Премиерот Зоран Заев денеска изјави дека околу десетина имиња се во игра за кандидат за претседателските избори на СДСМ. Тој најави дека ќе се избира најдоброто можно решение.
По имињата кои се појавија во јавноста, како актуелните министри и функционери, Радмила Шекеринска, Никола Димитров, Стево Пендаровски, Заев не посочи за кого станува збор, само дека се анализираат имиња меѓу кои има претставници од сите етнички заедници.
„Мислам дека нема партија од поголемите којашто не прави анализи и рејтинзи во моментов. Зошто? Затоа што секој сака да победи, секој сака да застане зад вистински кандидат. Секој сака на граѓаните да им го понуди најдоброто што постои. Да и ние правиме истражувања во овој момент по разни основи за да можеме секако да донесеме најпаметни одлуки“, рече Заев.
Тој најави дека СДСМ в петок ќе има средба на Централниот одбор на која ќе се разговара и за претседателските избори. Но, не прецизираше кога точно ќе биде познато името на нивниот кандидат.
Инаку претседателските избори треба да се распишат на 8 февруари, за да се одржат на 21 април. Евентуалните парламентарни избори би се одржале на 5 мај, заедно со вториот круг, а би се распишале во првата половина на март,со скратени рокови за изборните дејствија и за Пржинската Влада.
