Десетмина возачи приведени за безобѕирно управување, меѓу нив и 15-годишник

Десет возачи биле лишени од слобода во изминатото деноноќие на различни локации низ Македонија поради сомнение за безобѕирно управување со моторно возило.

— реклама —

Според Министерството за внатрешни работи, седуммина од нив управувале со возила без положен возачки испит. Меѓу нив има и двајца малолетници на возраст од 15 и 16 години. Приведените се од Скопје, скопските села Батинци и Блаце, селото Гошинце во Општина Липково, а еден од нив претходно учествувал и во сообраќајна незгода.

— реклама —

Други тројца возачи биле затекнати зад воланот и покрај активната забрана за управување со моторно возило. Станува збор за лица од Скопје, Крушево и Штип. Возачот од Штип истовремено управувал и под дејство на алкохол.

— реклама —

Сите десетмина се лишени од слобода поради сомнение за кривично дело „безобѕирно управување со моторно возило“, согласно со член 297-а од Кривичниот законик. По целосно документирање на случаите, против нив ќе бидат поднесени соодветни кривични пријави.

— реклама —

Од МВР апелираат граѓаните да не управуваат со возило без положен возачки испит, со активна забрана или под дејство на алкохол, со цел спречување на сообраќајни незгоди и заштита на човечките животи.