Српскиот трап-изведувач Драгомир Деспиќ – Десингерица повторно е во центарот на вниманието, овојпат пред најавениот настап во Охрид. Контроверзниот музичар на 5 август треба да настапи на фестивал во Охрид, но неговото доаѓање веќе предизвика бројни реакции на социјалните мрежи.
Во изминатите денови на интернет се шират објави од Црна Гора, во кои граѓани бараат Десингерица да не настапува во оваа земја, незадоволни од неговите сценски перформанси. Во меѓувреме, слични објави почнаа да се појавуваат и кај нас, каде што дел од корисниците на социјалните мрежи повикуваат неговиот настап во Охрид да биде откажан.
Последниот негов настап, кој предизвика лавина реакции во јавноста, се одржа во клубот „Ла Плаја“. Познат по екстремните сценски настапи, Десингерица среде концерт повика млад човек од публиката на сцената и со машинка почна да му ја бричи главата. По него, уште неколку момчиња доброволно седнаа пред него и беа избричени пред стотиците присутни.
Видеата од настапот експресно се проширија на социјалните мрежи. Додека дел од публиката го оцени потегот како уште една провокација и дел од неговиот препознатлив сценски имиџ, други сметаа дека ваквите перформанси одамна ја преминале границата на добриот вкус.
Ова не е првпат Десингерица да приреди вакво шоу. Минатата година, за време на настап во Нашице, на сличен начин бричеше посетители од публиката. Но, тоа е само дел од неговиот репертоар. На концертите често плука кон публиката, ги полева посетителите со вода, ги удира со патика по главата и приредува различни провокативни потези што редовно предизвикуваат контроверзии. И покрај тоа, неговите настапи низ регионот најчесто се распродадени.
Минатата година неговото име беше актуелно и откако градоначалникот на Бања Лука, Драшко Станивуковиќ, побара да му се забранат настапите во Република Српска, оценувајќи дека има негативно влијание врз младите.
На тие критики Десингерица одговори дека не чувствува одговорност за туѓите деца.
„Дали лошо влијаам затоа што сум семеен човек, имам жена и дете? Затоа што имам добра кола и живеам како Бог? Јас би сакал моето дете да биде успешно како мене. Најважно е да имаш здраво семејство, а јас тоа го имам. Туѓите деца не се мој проблем. Јас правам музика за возрасни. Родителите нека си ги воспитуваат своите деца“, изјави тој тогаш за српските медиуми.
И покрај бројните контроверзии што го следат, Десингерица и натаму собира илјадници обожаватели низ регионот. Сепак, останува да се види дали реакциите на социјалните мрежи ќе имаат какво било влијание врз неговиот најавен настап во Охрид на 5 август.
