Песната „Бејби Шарк“, светски популарниот детски хит на јужнокорејската образовна компанија Пинкфонг, надмина една милијарда слушања на платформата Спотифај.
Со тоа англиската верзија на песната стана првата детска песна и првата содржина базирана на анимиран лик што го достигнала овој успех, соопшти компанијата.
Песните со повеќе од милијарда слушања на музичките стриминг платформи најчесто ги изведуваат светски музички ѕвезди како Ед Ширан, Тејлор Свифт, како и корејските групи Би-Ти-Ес и Блекпинк.
Песната, препознатлива по рефренот „Бејби шарк, ду ду ду“, е омилена кај најмладата публика ширум светот поради едноставната мелодија и лесно запаметливиот текст.
Видеоспотот за песната досега собрал 16,9 милијарди прегледи на Јутјуб и веќе 65 месеци по ред е најгледаното видео на платформата на глобално ниво.
Само во текот на минатата година, песната била пуштена 137 милиони пати на Спотифај, што во просек изнесува околу 400.000 слушања дневно или пет репродукции во секунда.
Компанијата соопшти дека во изминатиот месец песната најмногу се слушала во САД, Велика Британија, Австралија, Канада, Мексико, Бразил, Германија, Филипини, Турција и Индонезија.
„Рамномерната слушаност на сите континенти потврдува дека песната ги надминува јазичните и географските граници“, наведуваат од компанијата.
„Бејби Шарк“ дебитираше на 32. место на американската листа Билборд Хот 100 во 2019 година, каде што се задржа 20 последователни недели, додека на британската листа на синглови стигна до шестото место.
