Девет пријави за семејно насилство за едно деноноќие, шестмина приведени

Во изминатото деноноќие, полицијата регистрирала девет случаи на семејно насилство низ државата, а шест лица биле лишени од слобода, информира Министерството за внатрешни работи.

— реклама —

Во Кавадарци е приведена 37-годишна жена која, според пријавата, физички ја нападнала својата 57-годишна мајка и ѝ упатувала закани. При извршеното алкотестирање кај неа биле измерени 1,02 промили алкохол во крвта.

Во Куманово бил приведен 71-годишен маж поради физички напад врз неговата 50-годишна сопруга, додека во Дебар е лишен од слобода 58-годишен маж кој бил агресивен кон својата мајка.

— реклама —

Во Штип полицијата привела 30-годишен маж осомничен дека физички ја нападнал својата 24-годишна партнерка, а во Пехчево бил приведен 50-годишник кој, според пријавата, ја нападнал сопругата и ѝ упатувал закани.

— реклама —

Во Скопје, на подрачјето на Центар, полицијата го лишила од слобода 42-годишен маж поради закани кон неговиот 63-годишен чичко и неговото семејство.

Покрај приведените, полицијата постапува и по уште три пријави. Во Ранковце било пријавено дека маж физички ја нападнал својата мајка, во скопската населба Аеродром, 40-годишен маж пријавил дека сопругата го повредила со остар предмет, а на „Јадранска магистрала“ во Скопје партнери меѓусебно се пријавиле за физички напад.

— реклама —

Од МВР информираат дека по целосно документирање на сите случаи ќе бидат поднесени соодветни пријави.