Димитров се сретна со грчкиот министер: Во ЕУ може со резултати, благодарност за поддршката

Денеска министерот Никола Димитров се сретна со министерот за надворешни работи на Грција, Џорџ Катругалос кој во име на грчката Влада присуствуваше на инаугуративната церемонија на претседателот на Македонија, Стево Пендаровски.

— реклама —

За време на состанокот, соговорниците ја потврдија подготвеноста за продолжување на позитивната динамика во која се развиваат односите и соработката меѓу двете земји. Беше нагласено дека средбите на највисоко ниво (особено со посетата на премиерот на Грција, Алексис Ципрас на Скопје), ја одразуваат желбата за градење на односи темелени на заемна доверба и партнерство.

— реклама —

Се разговараше и за економската соработка, со посебен осврт врз инфраструктурното поврзување, со што се олеснува севкупната комуникација на граѓаните и стопанските субјекти, вклучувајќи ги двата нови договорени гранични премини.

— реклама —

Министерот Димитров уште еднаш се заблагодари за грчката поддршка за членството на нашата држава во НАТО и ЕУ. Тој го нагласи задоволството од темпото на ратификација на пристапниот протокол во земјите-членки на Алијансата и ги пренесе и очекувањата дека реформските и добрососедските постигнувања на Македонија ќе добијат соодветно вреднување и од Европската унија: “Тоа ќе биде извонредно значајна порака до целиот регион: патот кон ЕУ е возможен и зависи од постигнати резултати.”