Димитровски: „По децениска запуштеност, скопското кале ќе добие содржини кои му доликуваат“

Скопје е град со историја долга речиси осум милениуми, чии траги се зачувани под денешните улици, мостови и булевари. Ова го истакнува Даме Димитровски, претседател на Советот на Град Скопје, посочувајќи дека различните цивилизации оставиле белег врз развојот на главниот град.

Меѓу најзначајните археолошки локалитети е неолитската населба Тумба Маџари, стара околу 8.000 години, позната по теракотната фигура на Големата Мајка, симбол на плодноста и еден од најпрепознатливите археолошки наоди во земјата.

— реклама —

Значајно место во историјата на Скопје има и античкиот град Скупи, кој располагал со театар, бањи, базилики и широки улици. По силниот земјотрес во 518 година, градот бил уништен, а населението се преселило на соседниот рид, на местото каде што денес се наоѓа Скопското Кале.

Тврдината е еден од симболите на Скопје. Археолошките истражувања покажале дека ридот бил населен уште во бакарното време, пред околу 6.000 години. На локалитетот се пронајдени керамика, монети, накит и остатоци од градби од различни историски периоди.

— реклама —

Димитровски нагласува дека богатото културно наследство претставува важен дел од иднината на градот. По долгогодишна запуштеност, Скопското Кале, според неговата порака, треба да добие содржини што ќе одговараат на неговото историско и културно значење.

— реклама —

„Скопје – од културна пустелија до културна престолнина“, порачува Димитровски, поврзувајќи ја оваа визија со амбицијата Скопје да стане Европска престолнина на културата.

„За Скопје какво што го сакаме“, порачува претседателот на Советот на Град Скопје.