Димовска: Судот нема да биде место за реализирање туѓи сценарија, никој не е над законот

Претседателката на Основниот кривичен суд Скопје, Даниела Димовска, во викенд-интервју за „Курир“ зборува за состојбите во македонското судство, недовербата на граѓаните во правосудниот систем, како и за нејзините заложби и приоритети во текот на мандатот.

Осврнувајќи се на прашањето зошто голем дел од граѓаните немаат доверба во судството, Димовска посочува дека проблемот не е ограничен само на судовите, туку е поврзан со поширокото чувство во општеството дека правилата не важат подеднакво за сите.

— реклама —

Таа се повика на филозофското сфаќање на Аристотел за правдата, според кое секој треба да го добие она што го заслужува, нагласувајќи дека граѓаните често не го препознаваат овој принцип во различни општествени сфери.

„Судот не може да ја исправи секоја неправда во општеството, но имаме одговорност да обезбедиме правото да важи во нашите судници“, истакнува Димовска.

— реклама —

На прашањето како во текот на нејзиниот мандат ќе покаже дека никој не е над законот, претседателката на Кривичниот суд вели дека тоа не се докажува со декларативни заложби, туку со создавање услови за еднаква примена на законите.

— реклама —

Таа потенцира дека судиите одлучуваат самостојно и независно, додека нејзина обврска како претседателка е да обезбеди институционална клима во која тие ќе можат професионално и без притисоци да ја извршуваат својата функција.

„Она што можам да го ветам е дека сè додека сум на оваа функција судот нема да биде место каде што ќе се реализираат туѓи сценарија, дека никој нема да добие привилегија, но и дека никој нема да биде жртва на нечие очекување, притисок или однапред креирано сценарио“, порачува Димовска.

— реклама —

Во интервјуто таа зборува и за приватниот живот, семејството и улогата на мајка, сопруга и тетка, откривајќи дел од секојдневието надвор од судницата.

Целото интервју со претседателката на Основниот кривичен суд Скопје, Даниела Димовска, е објавено на „Курир.мк“.