Директорот на Центарот за управување со кризи, Мухамед Али, објави фотографија од теле за кое тврди дека било спасено од пожарникарите при вчерашниот голем пожар над селото Палиград на планината Китка. Но, фотографијата што ја употребил во објавата не е од пожарот во Македонија – таа е направена во Калифорнија пред шест години.
Фотографијата е дел од сторија на американскиот медиум „Successful Farming“, објавена на 9 септември 2020 година, со наслов „Чудесното теле го преживеа пожарот во Калифорнија“. Во оригиналната сторија е наведено и дека фотографиите се на Саманта Каскарини.
Приказната од Калифорнија навистина се однесува на теле спасено од опожарено подрачје, но околностите се различни од оние што ги опишува директорот на ЦУК.
Според американскиот медиум, пожарот избувнал во август 2020 година во близина на Милпитас, Калифорнија, а зафатил и ранч со околу 500 говеда. Саманта Каскарини го пронашла новороденото теле на парче влажна трева среде изгореното пасиште. Телето било старо само неколку минути, имало изгорени трепки и било пренесено на безбедно со четирицикл.
Телето подоцна го добило името Шарлин и закрепнало од повредите. Во пожарот биле опожарени околу 80 проценти од ранчот.
Наспроти тоа, Али во својата објава наведува дека вчера, додека бил на местото на пожарот над Палиград, пожарникарите од Противпожарната бригада на Град Скопје спасиле мало теле кое останало на опожарениот терен.
„Во метежот и огнот, пожарникарите од Противпожарната бригада на Град Скопје успеаја да спасат едно мало теле кое останало на опожарениот терен. Мало, исплашено, но живо – една мала победа во тешкиот ден“, напиша Али.
Тој додава дека секој спасен живот е важен и апелира на одговорност поради опасноста што пожарите ја претставуваат и за животните.
Сепак, фотографијата со која е илустрирана објавата нема врска со вчерашниот пожар кај Палиград. Таа документира друг настан, на друг континент, од 2020 година.
Од јавно достапната американска сторија може со сигурност да се утврди потеклото на фотографијата и вистинската приказна зад неа. Самата употреба на старата фотографија, сепак, не е доказ дека спасување теле кај Палиград воопшто немало – туку дека фотографијата што директорот на ЦУК ја употребил за да го претстави настанот не е автентична фотографија од него.
Се извинувам за настанатата забуна, сликата е само илустрација на текстот кој е вистинска случка. Ве поканувам во селото Палиград, на место со мене имаш 6 пожарникари, од Скопје, случката е пишана како што беше, и телето е спасено жива здрава!, изјави Директорот на Центарот за управување со кризи, Мухамед Али по бурните реакции.
