Директорот на Пинтерест, Бил Реди, ја поддржа австралиската мерка со која се забрануваат социјалните мрежи за млади тинејџери и повика владите ширум светот да воведат слични забрани.
„Социјалните мрежи, во обликот во кој се денес, не се безбедни за лица под 16 години. Потребен ни е јасен стандард: без социјални мрежи за тинејџери под 16 години, со реално спроведување на законот и одговорност на мобилните апликации и оперативните системи“, напиша Реди во авторски текст објавен во Time.
Реди истакнува дека оваа забрана не би требало да се однесува на Пинтерест, бидејќи платформата веќе ја ограничува употребата на функции за размена на пораки и други социјални опции за тинејџери под 16 години. Дополнително, профилите на тинејџерите автоматски се приватни.
Портпаролот на Пинтерест потврди дека компанијата нема планови да ја менува својата политика за корисници помлади од 16 години и ја дефинира Пинтерест како „платформа за визуелно пребарување“, а не како социјална мрежа. Како и повеќето социјални мрежи, Пинтерест не дозволува регистрација на корисници помлади од 13 години.
Во минатото, Пинтерест се соочи со проблеми околу безбедноста на децата. NBC News во 2023. година објави дека алгоритмот на Пинтерест препорачувал фотографии и видеа од млади девојчиња на возрасни корисници. По шест месеци, компанијата ги направи профилите на тинејџерите под 16 години приватни.
Според Реди, популарноста на Пинтерест меѓу младите е доказ дека ваквите политики се добри и за бизнисот.
„Нашето искуство покажува дека давање приоритет на безбедноста и благосостојбата не ги одвраќа младите; тоа гради доверба“, напиша тој.
