Директорот на затворот во Ниш призна пропуст: „Верував дека работиме во интерес на Србија“

Директорот на затворот во Ниш, Братислав Дикиќ, признал дека вработени во установата собирале податоци за излезноста на граѓаните и следеле активности поврзани со таканаречените „капиларни гласови“, односно организирано обезбедување поддршка од гласачите. Во допис до колегите тој навел дека таквите активности не биле во надлежност на затворот и признал дел од одговорноста, објави „Нова.рс“.

Дикиќ во дописот објаснил дека затворот во Ниш на парламентарните избори во Србија, одржани на 25 октомври, го организирал гласањето на затворениците, што претставувало законска обврска. Според неговите сознанија, вработените не влијаеле врз нивниот избор, но паралелно добивале барања да ги следат активностите поврзани со „капиларните гласови“ и да собираат податоци за излезноста, кои потоа биле проследувани понатаму.

— реклама —

Како што навел, во Центарот за обука и оспособување била формирана оперативна група која собирала извештаи од затворите во Врање, Лесковац, Прокупље, Заечар и Ниш, а потоа ги испраќала до централниот штаб.

„Верував дека на тој начин ги извршуваме наредбите на Управата за извршување кривични санкции и придонесуваме за заштита на државата Србија и нејзините институции. Меѓутоа, сфатив дека добрата намера не може да ја замени законитоста и дека никој од нас, без оглед на положбата и функцијата, не смее да ги занемари границите на своите службени овластувања“, напишал Дикиќ.

— реклама —

Тој додал дека вработените погрешиле прифаќајќи задачи што не биле во нивна надлежност и дека ниту упатствата од раководството не ги ослободуваат од обврската да проценат дали добиените барања се законски.

— реклама —

Дописот го објавил адвокатот Иван Ниниќ, кој претходно поднел кривична пријава против 63 лица поради сомневања за организирање собирање гласови за Српската напредна партија (СНС) во затворите низ Србија. Дикиќ, сепак, во своето обраќање тврди дека немало притисоци врз затворениците и дека не било влијаено врз нивното право самостојно да одлучат за кого ќе гласаат.

Случајот се надоврзува на апсењето на управникот на затворот Забела во Пожаревац, Родољуб Рончевиќ, кого полицијата го сомничи за злоупотреба на службената положба и поткуп во врска со гласањето. Според српското Министерство за внатрешни работи, тој на затвореници им делел цигари и кафе, кои биле доверени на чување на затворот, со цел да гласаат за изборната листа со број еден, предводена од СНС. Дел од цигарите, според полицијата, биле предадени и на други затвори. На Рончевиќ му е одреден притвор до 48 часа.

— реклама —

На парламентарните избори во Србија на 25 октомври победи Студентската листа, освојувајќи 140 од вкупно 250 места во Народното собрание. Листата предводена од СНС освои 103 пратенички места. Конечните резултати биле потврдени по повторувањето на гласањето на 53 избирачки места.